Në vendin tonë, 1 në 4 individë që janë në moshë pensioni, nuk arrijnë të marrin asnjë kontribut monetar. Sipas të dhënave më të fundit të publikuara në raportin e Organizatës Ndërkombëtare të Punës, ILO, në Shqipëri, marrin pension vetëm 77% e kësaj kategorie, ndërsa pjesa tjetër, realisht nuk përfiton asgjë. Këto shifra tregojnë edhe njëherë se vendi ynë nuk i plotëson standardet dhe madje është larg të qenit një shtet i mirëqenies sociale. Fakti që jo çdokush që është në moshë pensioni, nuk e përfiton një të tillë, e rendit Shqipërinë larg Europës Perëndimore.
Gjithsesi, në lidhje me këtë çështje, vendi ynë rezulton me performancën më të mirë në rajon, duke i lënë pas të gjitha shtetet fqinje. I vetmi vend rajonal që paraqitet më mirë se ne, është Greqia, e cila kap normën 77.4%, pra 0.4% më lart. Pavarësisht kësaj, mesatarja e Europës dhe Azisë Qendrore ndërkohë fiksohet në 95.2%. Por, Organizata Ndërkombëtare e Punës, ILO, në bazë të raportit që ka publikuar, jep alarmin për Shqipërinë edhe mbi asistencën sociale pasi vetëm 6.9% e të papunëve marrin pagesë monetare për shkak të situatës ekonomike që paraqesin. Të gjitha këto shifra tregojnë se Shqipëria renditet shumë larg shteteve të mirëqenies sociale.